Այսօրվա դրությամբ Հայաստանի Հանրապետությունում արձանագրվել է գրիպի A H1N1 վիրուսային վարակի լաբորատոր հաստատված 111 դեպք, որից 3-ը մահվան ելքով: Ներկայում հանրապետության բուժկանխարգելիչ կազմակերպություններում բուժվում է 2 հիվանդ: Մնացած հիվանդները, թվով` 106, առողջացումով դուրս են գրվել:
Հանրապետությունում շարունակվում է սուր շնչառական վիրուսային հիվանդությունների օրական մոնիթորինգը, որն իրականացվել է նաև տոների ընթացքում: Համաձայն մոնիթորինգի տվյալների հիվանդացությունը նվազել է: 2009թ. նույն ժամանակահատվածի հետ համեմատ հիվանդացությունը գտնվում է գրեթե միևնույն մակարդակի վրա: Նկատելի նվազել են նաև շտապ օգնության կանչերը:
Բնակչության շրջանում իրականացվում է առողջ ապրելակերպի քարոզչություն և բժշկահիգիենիկ գիտելիքներ են տարածվում: ԶԼՄ-ներով բնակչության իրազեկման աշխատանքներ են իրականացվում:
Շուրջօրյա գործում է առողջապահության նախարարություն թեժ գիծ` երկու հեռախոսահամարներով:
Ընթացիկ տարվա հունվարի 11-ից հանրապետության կրթօջախներում վերսկսվելու է ուսումնական գործընթացը և առողջապահության նախարարությունը կրկին հիշեցնում է, որ պետք է խստորեն իրականացնել բոլոր այն միջոցառումները, որոնք ուղղված են սուր շնչառական վիրուսային հիվանդությունները կանխարգելմանը.

• հնարավորինս խուսափեք շփվել գրիպով հիվանդ անձանց հետ
• եթե հիվանդ եք` մնացեք տանը
• մի զբաղվեք ինքնաբուժմամբ, անմիջապես հրավիրեք ձեր տեղամասային մանկաբույժին կամ թերապևտին
• հազալիս կամ փռշտալիս փակեք բերանն անձեռոցիկով, օգտագործված անձեռոցիկը գցեք աղբամանի մեջ
• հաճախակի օդափոխեք փակ տարածքները
• հագնվեք եղանակին համապատասխան