Գյումրու ինֆեկցիոն հիվանդանոցում աղիքային երևույթներով` սննդային թունավորում նախնական ախտորոշմամբ հոսպիտալացված հիվանդներն անցած օրերի և այսօրվա ընթացքում դուրս են գրվել: Հիշեցնենք, որ փետրվարի 18-ին ՀՀ առողջապահության նախարարություն ահազանգ էր ստացվել Շիրակի մարզային պետական հիգիենիկ և հակահամաճարակային տեսչությունից առ այն, որ ժամը 23:00 սահմաններում Գյումրու ինֆեկցիոն հիվանդանոց են հոսպիտալացվել "Նաիրի" ռեստորանային համալիրում կատարվող հարսանյաց հանդեսի մի շարք մասնակիցներ: Համատեղ կազմակերպվեց հիվանդների ստացիոնար բուժումը, իրականացվեցին հակահամաճարակային միջոցառումներ:
Վարակի փոխանցման հավանական գործոնը սնունդն է, քանի որ հիվանդները օգտվել են հանրային սննդի կազմակերպությունում պատրաստված կերակրից, վարակի գաղտնի տևողության ժամանակաշրջանն ու կլինիկական ախտանիշները, ինչպես նաև դրանց միամոմենտ ի հայտ գալը բնորոշ են սննդային թունավորմանը:
Հակահամաճարակային միջոցառումները շարունակվում են:
Հանրային սննդի կազմակերպության գործունեությունը ժամանակավորապես դադարեցվել է: Օգտագործված սննդամթերքից վերցված նմուշները լաբորատոր փորձաքննության փուլում են:
Իրավիճակը վերահսկվում է:
