ՀՀ կառավարության բարձրաստիճան պաշտոնյաները, տեղական և միջազգային փորձագետները, քաղաքականություն մշակողները, առողջապահության մարզային մասնագետներն ու ՀԿ-ների ներկայացուցիչներն այսօր քննարկել են Առողջապահության համաշխարհային կազմակերպության և Համաշխարհային բանկի աջակցությամբ ՀՀ առողջապահության նախարարության կողմից մշակված երկու նոր զեկույցները` առողջապահության համակարգի գործունեության գնահատման և առողջապահության ազգային հաշիվների վերաբերյալ: Վերջիններս միտված են շարունակաբար նպաստելու առողջապահական համակարգի ամրապնդմանն ուղղված ջանքերին:
Զեկույցներում արտացոլված է 2009թ. տնտեսական ճգնաժամին նախորդած ժամանակահատվածում առողջապահության ոլորտում կատարված հանրային ներդրումների շարունակական աճը, որի շնորհիվ վերջին տարիներին զգալիորեն նվազել են երեխաների, նորածինների և հետծննդյան մահացածությունները, իսկ ծննդյան պահից կյանքի տևողությունն աճել է: Ավելին, ընթացքի մեջ են առողջապահության ոլորտի շոշափելի կառուցվածքային ու համակարգային բարեփոխումները: Առաջնային բուժօգնության բարեփոխումները և մարզերում հիվանդանոցային ցանցի օպտիմալացման գործընթացն առանցքային դեր ունեն մինչև 2015թ. Հազարամյակի զարգացման նպատակների իրագործման հարցում: Չնայած այս զարգացումներին` զեկույցներն այնուամենայնիվ մատնանշել են մի շարք մարտահրավերներ:
Այս փաստաթղթերում առաջարկվում է մշակել Հայաստանում ազգային առողջապահության բարելավման ամբողջական օրակարգ` հիմնված երկրի մարտահրավերների, ինչպես նաև դրանց արդյունավետ հաղթահարման համար անհրաժեշտ առկա համակարգերի, մեխանիզմների և ինստիտուցիոնալ հզորությունների ուսումնասիրության վրա:
Միջոցառման ընթացքում քննարկվել են նաև հնարավոր այն եղանակները, որոնք թույլ կտան լավագույնս կիրառելու այս զեկույցները ոլորտի քաղաքականության ձևակերպման ու հարմարեցման գործընթացներում:
