ՀՀ առողջապահության նախարար Հարություն Քուշկյանն ընդունել է տուբերկուլոզի դեմ պայքարի գործում համագործակցող միջազգային կազմակերպությունների ղեկավարներին: Հանդիպմանը ներկա էին ՀՀ ԱՆ գլխավոր ֆթիզիատր Մարինա Սաֆարյանը, առողջապահության նախարարության մի շարք ստորաբաժանումների ղեկավարներ:Նշենք, որ ՀՀ առողջապահության նախարարությունում գործում է Տուբերկուլոզի դեմ պայքարի ազգային ծրագիրը, որին աջակցում են ԱՀԿ հայաստանյան գրասենյակը, ԱՄՆ ՄԶԳ առողջապահական ծրագրերը, <Բժիշկներ առանց սահմանների. Ֆրանսիա> կազմակերպությունը, Հայաստանի ամերիկյան համալսարանը, ինչպես նաև Գլոբալ հիմնադրամը:
Հանդիպման առիթը միջազգային գործընկերների հետ համագործակցության ծավալներն ու տեսակները մեկ անգամ ևս հստակեցնելն էր: Աշխատանքները չկրկնելու և առավել արդյունավետ կազմակերպելու համար ՀՀ առողջապահության նախարարը միջազգային կազմակերպությունների ղեկավարներին առաջարկել է ներկայացնել համագործակցության նոր ծրագրեր` հատկապես դեղակայուն տուբերկուլոզի բուժմանն ուղղված:
ՀՀ ԱՆ գլխավոր ֆթիզիատր Մարինա Սաֆարյանին, որը նաև ղեկավարում է Աբովյանի հակատուբերկուլյոզային դիսպանսերը, հանձնարարվել է ներկայացնել տուբերկուլոզի բուժման ներկայիս մեթոդների առավելություններն ու թերությունները, ինչպես նաև առաջարկել նորը:
Հյուրերը պատրաստակամություն են հայտնել համագործակցել առաջարկվող ձևաչափով և հույս են հայտնել, որ նման աշխատելաոճը կնպաստի Հայաստանում դեղակայուն տուբերկուլոզի դեպքերի նվազմանը:
Հաջորդ հանդիպումը, որը նախատեսվում է առաջիկայում, գործնական քայլերի սկիզբ կհանդիսանա:
